Niyanig ni Filipina tennis star, Alexandra “Alex” Eala, ang damuhan ng Steffi Graf Stadion matapos pabagsakin si World No. 2 Elena Rybakina ng Kazakhstan, 7-5, 6-4, at masungkit ang tiket patungong quarterfinals ng 2026 Berlin Open sa Germany nitong Biyernes, June 19.
Umahon mula sa hukay ang kamakailang Birmingham Open winner makaraang agawin ang 4-1 lead ni Rybakina sa unang set at maitabla ito sa 4-all hanggang sa manduhan ni Eala ang tatlong sunod na laro para okupahin ang crucial opener.
“I’m really happy with today, of course. It could have gone either way. I think there were really tight moments in both sets. And of course, she’s an amazing player. And yeah, she’s the one to beat. So I’m happy to have been able to share the court with her again,” ani ni Eala.
Matapos ang dikitang unang kanto, sumagot ang Filipino wildcard ng matatalim na returns sa ikalawang set para patagin ang 3-1 bentahe bago mabawi ni Rybakina ang kalamangan at maitabla ang iskor.
Subalit, patuloy ang pag-alagwa ni Eala sa mga naturang serve kasabay ng pagbasag sa humuhupang service ng former Wimbledon champion sa gitnang bahagi ng bakbakan na nagbitbit sa World No. 35 ng 5-3 kalamangan.
Sinubukang tapyasin ni Rybakina ang lamang nang magligtas ng isang laro ngunit agarang rinespondihan ni Eala upang ikandado ang laro sa 6-4 na tagumpay.
Pirming nakapokus si Eala sa kaniyang tuloy-tuloy na kampanya kung saan susunod na haharapin nito si World No. 8 Elina Svitolina ng Ukraine bilang bahagi ng preparasyon sa papalapit na Wimbledon.
